林欣彤重提失聲經歷

林欣彤(Mag)日前作客TVB娛樂新聞台節目專訪，談到新歌《失戀的人站起來》，Mag說：“自己失戀時候會爆喊，但係為工作又要扮冇事，情緒上我可以扮到，但個樣就唔合格，因為我一喊，對眼就會好腫。”

Mag亦在節目中重提去年再度失聲的經歷：“冇嘢慘得過失聲！上年身體好痛，有段時間一出聲好似被刀割咁。再加上情緒唔好，壓力導致胃酸倒流，令我成個人殘晒。唯一好處就係個人瘦咗，上鏡會靚，不過就唔精神。依家我越來越鍾意做運動，爆汗好爽好開心。我唔只係為演唱會才去做運動，因為運動本身對身心都好。”