加洲之寶爆畀你睇

馬季開鑼跑過多仗後，華將陸續有人開齋，現只剩牌仔張志立未贏馬。此子上季尾因傷缺陣已久，周日傷癒出戰，由於餓馬多時，料必拼盡求逞。張志立乃練者錢健明徒弟，上季取二十四W，龍虎榜排第六位，成績不俗。此子替錢廄贏九W，且效力張兆煊、謝貴全及王君適廄亦有戰功。張志立今季可獲減五磅，牌子仍好使好用，周日上陣且看可否開齋。

另一華將蔡義武轉為自由身後，上季取十四W，成績不過不失。此子騎功未算一流，但時有神來之筆。上季不少大師傳搏輸之駒，下次交其主轡每有好表現。做騎師功架好，下駒能贏上駒，唯戰意最重要。若陣上無鬥志，騎馬王都輸。蔡義武好鬥志，座騎冷熱皆拚。此子上季以浩廄為策騎基地，已替廄主摘取六W。此外，效力譚文就、王君適、張兆煊、陳俊輝及李家輝廄亦贏馬。今季開齋馬“卓人勇”是來自馮廄。由此可見，受各練者器重。浩廄上季交馬予蔡義武搏殺頻有戰功，兩人合作搵到食。周日第五場二、三班千二米，浩廄“加洲之寶”交由蔡義武執韁，此雙騎練又來搵食，不妨吼緊。

“加洲之寶”千二米路程專家。前兩季取得豐功偉績，唯馬匹贏得多評分調高，上季屢拼無功。此駒連敗後評分驟減，目前居班有利可圖。近期易主後，新馬主既肯接手豢養，照計此駒仍有一定作為。蔡義武上仗跑沙地一手跟進，敗後易地重來，復跑拿手路程料必有計。今於二、三班混戰，贏盡班底。遇同組對手無多，形勢有利。蔡義武、梁國浩騎練合作無間，“加洲之寶”可爆畀你睇。