睇波泊車無地方

違例抄牌冇得講

昔日球賽多人看

香港勁旅常來訪

近期夜間，鮑思高球場人聲鼎沸，又是小球賽開戰。

見有電單車泊滿街，汽車泊巴士站範圍，便知有比賽。見到一頭一尾有交警，抄牌睇下邊個唔好彩。此處無電單車泊位，要泊車，須到對面橫巷或到文弟士街搵位泊，實在遠了些，故球迷多在墳場附近泊上行人路，如果泊到阻街，交警便會執行職務。球迷不想違例，亦不想幾百文睇場波，奈何真的冇位，大起癮來只好違泊。

好戲碼時，鮑思高球場看台頗多觀眾，主要是多支球隊華洋混雜，不乏好波之人，加上七人小球場地細，看起來較緊湊，射入波時，起哄聲喧。朋友住在對面大廈低層，不時聽到，習以為常。

昔日鮑思高球場係沙地，小球賽亦在此上演。想當年，除了華人好手外，還有洋陸軍球隊，洋將加土生，實力強勁，每逢與沙崗、群力、合群、藍英等勁旅碰頭，戰況激烈，甚有瞄頭。有香港強隊來訪，還要收錢入場，盛極一時。

當年澳門小球水準頗高，香港勁旅來澳挑戰，儘管威盡修頓球場，但遇到澳門強隊，亦會敗走麥城。每有大戰，南灣工人球場更多球迷觀看，圍滿四個角落，場面墟冚。最震撼比賽係有榮隊來澳作賽，好波老細霍英東收香港猛將為己用，粒粒皆星，還自己親自落場，球員自然識做，餵靚波畀老細射門，成一時佳話。

自從工人球場變了新葡京後，球迷少了一處聚腳點，小球賽便移師鮑思高及關閘工人球場。隨着資訊發達，電視及網絡常播放世界最高級別比賽，包括英超、西甲、德甲、法甲、意甲、葡超及中超等，球迷睇慣好波，口味有所揀擇，故而香港波及本地大波賽事，球迷已無多大興趣矣。

羅倫斯