警福會獨腳戲戰海關

【本報消息】本地甲組七人小球錦標賽，今晚七時三十分鮑思高球場上演一場補賽，警察福利會迎戰海關。警福會人腳稍稍佔優，或有望睇好開齋搶今季首勝。

警福會戰海關一仗原定上月舉行，但因天雨延期。兩軍開季同樣未嘗一勝，警福會首戰逼和蒙地卡羅，次役則在警察兄弟班內訌中輸波。不過兩戰表現不差，其中守和蒙卡一戰，防守亦見硬淨，前線李幗寶、梁振邦、石威廉等實力不俗，門將李東同樣交出不錯表現。

海關開季三戰連輸青鋒、士砵亭及澳科鄒北記，吳海、莫子揚及楊子華等主力狀態一般，上戰大敗於鄒北記腳下，三戰一球未得更勁失十六球，防守漏洞多。雖然警福會實力未算頂班，但人腳仍有優勢，有力睇高半線，力爭一勝。