珍糯米糍克敵制勝

今季騎師陣營競爭激烈，龍虎榜排名又有變。馬雅季初缺陣，復出後連仗贏馬，現排名重登首榜，暫領風騷。馬雅今仗座騎有份量，捧場客可留意。華將現只剩張志立未開齋。此子今次手握重兵，拚盡可勝。

張志立乃練者錢健明愛徒，騎功唔算差，陣上亦具鬥志，搏殺時交得準繩，故受練者器重。上季因傷缺陣多時，此子復出尚未贏馬。但跑完上仗個人狀態返來，今獲師父提供多駒搏殺，兩師徒拍檔搵食，馬迷欲扒冷，不妨吼此子座騎。

第二場：二、三班一三五○米。“珍糯米糍”上仗新季初出落敗，看跑法是熱身性質。拚後重新打磨，晨操由張志立連摸幾課，馬匹試來神態生猛，狀態可及鋒而試。前速夠快，竄勁銳利，今番回配曾贏三捷的張志立主轡，憑人馬夾檔，可克敵制勝。

第三場：一、二班一三五○米。“旺角益友”沙地戰連季摘取五冠兩亞五季，跑沙地特佳。此駒季初連場落敗，看來只為減分。拚後小休再臨，今仗熱夠身起用牌仔減磅出擊，擺明要搏殺。此駒轉跑一三五○米亦可應付。憑騎者駕輕就熟，冀可打開新季勝之門。

第六場：四班一五一○米。“天意弄人”上仗馬雅負重磅力拚落敗，但馬匹表現未算太差。拚後易配張志立再來，幕後擺明要借助牌仔減磅再搏。今季成熟進步，應不同估計。此駒跑沙地唯一出路，今番班宜路合，憑騎者鬥志，拚盡可望贏馬。