從龍蝦丸冇龍蝦談起

日前熱話，鄰埠消委會測試龍蝦丸，發現沒有龍蝦成分，部分牛丸含有豬和雞成分，更有牛肉比例少過豬和雞，墨魚丸個別有魷魚成分。事件令業界震驚，亦有謂如此價錢有龍蝦先出奇。但從標籤法角度，似有詐騙成分。個案一如餐廳菜單將魚翅改素魚翅替代。

令人想起山竹牛肉球，個別食店採用新鮮或急凍牛肉；大約成分有牛肉、陳皮、馬蹄、芫荽及肥豬肉等。份量中有加入少許肥豬肉，目的並非欺騙，而是令牛肉丸更香更滑。

熟悉的街頭小食，福隆新街碗仔翅、永樂戲院碗仔翅，排隊食客冇祈望是海虎翅或牙揀片，但卻成為澳門的美食名片。之前鬧得熱哄哄，食咗幾十年的粟米斑塊飯，售價約三數十元，食客都冇奢想是老鼠斑還是東星斑；其後建議改為粟米魚柳飯，霎時間反覺尚未習慣！

馳名多年的潮連燒鵝、生炸龍崗雞、大良炒鮮奶、力康雞蛋撻等，地名只不過指按地道特色製作，或指採用優質的食材。澳門近年已採用冰鮮家禽，相信食家亦理解不會是原產地的燒鵝。歷來已是本澳特色飲食文化，但如何取捨或矯枉過正，反而未能突顯其菜式獨特性。

當年的金句“魚有魚味、雞有雞味”，以為是星爺爛gag，其實是源自電視飲食節目主持人，當時還受到同行的譏笑。現今可解釋是形容食材的質素，雞是真可冇雞味、魚可冇魚味；因有分新鮮雞、冰鮮雞及雪藏雞。雪藏雞當然冇活雞的鮮味；唔新鮮發霉的魚當然冇魚的鮮味，甚至還會有腥味添。

普洱茶