駕車謹慎仍違規

打爛齋缽話友儕

車多位少冇得泊

硬食抄牌無辦法

一年容易過，轉眼十二月，明年要納牌。每年此時，友人話會查看手機交通廳網頁，看看有否交通違例。

友人聲稱一向駕駛謹慎，斑馬線見人必讓，不衝黃紅燈，查網當係例行公事。孰料網頁打開，彈出有違例簡單字句，再深查，被指在某某地段違例。佢話天眼果真厲害，唔覺意中招，罰款事小，打爛齋缽事大，守規貞節牌坊冇埋。

科技世界，派牛肉乾已電子化，差哥抄牌不久，車主即收短訊。有些違規無即時通知，都能網上查閱，普通違規可網上繳罰，交了罰款，網頁即彈出“沒有違例紀錄，請繼續保持良好駕駛習慣”等字樣。

友人話，當局設在巴士站的監控系統最易中招，如有車輛在華士古停車場等入閘，稍一遲疑，便會被錄到；鏡湖馬路醫院側的巴士站前有監控，若蒙查查等入醫院停車場，就會“請君入甕”。日間停車巴士站，算心甘命抵畀罰款，弊在夜間停泊，全無阻街，亦無巴士埋站，咁都被抄牌，屬矯枉過正，很多地方夜間都有泊孖車，仲阻街，反而冇警理。

話雖如此，夜泊巴士站被抄牌，按例警有職責，如果泊到清晨有巴士開到，那時又會有人說警唔執法。執生與執法，或是選擇性執法，就看其個人做法，抄得多，上頭或會讚其勤力盡責。作為駕駛者，還是守法為佳。

很多駕駛者都不想違泊，問題是電單車與街位不成比例，當局不時取消泊位讓行車順暢，口中話在其他地方增泊位，實則得個吉。打工仔一個月被抄牌三兩次，會覺很傷，難免有怨氣。官爺高薪厚職，或擁眾多車位唔愁泊，就算違法罰款，都係九牛一毛。為官者應多為小市民着想，功德無量！

羅倫斯