陳家樂新歡舊愛同場

連詩雅余香凝劃清界線

前晚，連詩雅(Shiga)、余香凝、吳業坤、胡鴻鈞、譚嘉儀、李樂詩及呂珊等，為籌款節目《明愛暖萬心》錄影，當晚由汪明荃、麥明恩、何依婷、林溥來及吳天佑擔任司儀。穿上五吋高踭鞋的Shiga，顯得十分高挑，她說中學時期因長得高曾被同學欺凌：“成日畀人話我咁高可以換電燈膽，女同學唔鍾意同我玩，可能生得高令人覺得我高傲。”

Shiga說其實好多人同她相處後，都覺得她表面好似好cool，但估唔到本人係傻更更又論盡。她稱入行後覺得，女仔身形高挑會更好看，初出道時她自覺有點大隻，便好努力去修身。最近播出的劇集《那些我最愛的人》入面的身形，是她最滿意的。她說：“之前因疫情關係工作減少，都有肥咗，有同自己講要喼返。”

最近疫情再度在社區爆發，談到Shiga的工作可有受影響，她坦言由年初開始，工作陸續取消，直至兩個月前才稍稍為好轉，拍了幾個廣告，但近日有些演出又要押後及轉為網上直播。她笑言目前反而擔心家中的口罩及食糧短缺問題：“最近發覺原來屋企只剩返兩盒口罩，又要四圍撲口罩，因為我負責屋企所有嘢，廁所塞咗燈膽壞咗都係我負責，好似管家咁。（冇搵緋聞男友陳家樂幫手入貨？）自己啦，我都識揸車，我唔鍾意麻煩人，我係獨立女性。（叫家樂幫手買口罩？)冇問，我永遠係幫人撲口罩嗰個。（你幫家樂買埋口罩？）如果有朋友需要買口罩我都一定會幫。”

陳家樂的新歡舊愛連詩雅與余香凝前晚首度同場演出，但二人未見有交談，影大合照亦分開兩邊企。余香凝前晚穿上黑色長裙獻唱楊千嬅的歌曲《小城大事》，大騷長腿及胸前若隱若現，影相時發覺她有小肚腩，即吸氣挺胸收腹，十分搞笑。她說當晚同七十人的管弦樂團一齊演出，所以想穿得隆重些：“一身打扮高貴優雅得來又不失性感，條裙係我自己揀，因為上次來演出時肥了十幾磅，而家身型瘦返啲，着起來會比較好睇，為咗着呢件晚裝，我全日只係飲果汁，肚餓就只係食多兩條菜。”

她透露最近影了一輯性感相，當中有類似內衣款式，不過這輯相只是趁青春留倩影，未有打算出寫真集。為何突然有這個想法？她說：“因為我啱啱過咗生日，覺得廿七歲係轉捩點，算係輕熟女，不過我同事話我性感唔到，叫我練吓啲表情，我都會練，希望第時遇上性感女角色，我都可以Handle到。”