青欖煲鮮鮑

進入秋天，天氣時涼時熱好易病。仲要呢個年頭，周圍地區都仲有疫情，相信大家每逢有些少頭暈身都會驚餐死。計我老周話，今個秋冬真係要好好補身，強身健體，所以今期我又同大家煲返個潤喉補肺、做法同材料都相當簡單嘅一個湯水——青欖煲鮮鮑。

呢個湯有齊多種營養，大人細路都啱飲。青欖有生津止渴、補肺嘅作用，啱晒氣管敏感嘅朋友仔。今次仲特別加入近日當造嘅無花果，佢含豐富嘅維生素同花青素等抗氧化物質，抗老又抗癌，所以又稱為“生命之果”，好嘢嚟㗎。兩種酸甜帶甘嘅果類，再配埋鮮甜嘅鮑魚，煲出嚟嘅湯水別有一番風味，保證可口。

材料有：九孔鮮鮑十二隻、豬一條、青欖十五至二十粒、無花果四粒、南北杏半両，以及薑四片。做法：青欖用刀拍開，無花果洗淨，備用。鮑魚去殼，仔細清洗乾淨，特別要清乾淨啲青苔同內臟。豬同樣洗淨，然後出水。清水煲滾後，將所有材料一齊放入去煲，煲約個半鐘後就可落鹽調味，咁就有靚湯飲

周 中

（澳門美高梅金殿堂烹飪顧問）