香煎蓮藕餅

今年秋意好似嚟得比往年早，十月頭天氣已經相當乾爽。不時不食嘅我哋，梗係要好好利用秋天當造嘅食材煮好餸。唔知大家有無聽過“荷蓮一身寶，秋藕最補人”呢句說話？立秋之後，蓮藕正值盛產期，亦好有營養，有清熱涼血、健脾開胃等嘅功效。蓮藕就唔一定淨係攞嚟煲湯，用嚟炒餸、燜肉、做炸物一樣掂。今期老周我就同大家分享一個傳統嘅家鄉式香煎蓮藕餅，做法簡易家常，趁呢排當造，大家可以整吓，食多啲蓮藕。

材料有：蓮藕半磅，豬梅肉二両，冬菇一隻，蝦米五錢，生粉一湯匙半，雞蛋一隻，葱花少許，鹽一茶匙，生抽一茶匙，麻油半茶匙。做法：將蓮藕磨碎，或用刀切成碎粒，備用；豬肉剁成肉碎，冬菇同蝦米切細粒，撈入蓮藕碎同所有調味料，搓成一個個波，然後撳扁成大小、厚薄適中嘅圓餅。起油鑊，放入藕餅，兩邊煎至金黃，即可上碟。

（澳門美高梅金殿堂烹飪顧問）

周 中