單文柔自爆家中比武

陳展鵬錫住老婆唔敢還手

記錄一眾龍虎武師為香港電影作出貢獻的電影《龍虎武師》，前晚八號風球下在香港舉行首映禮。香港動作特技演員工會會長錢嘉樂率多位龍虎武師到場支持，劉偉強、程小東等電影人也到場助陣，對影片大加讚賞。陳展鵬與太太單文柔亦拍拖來撐場。

陳展鵬受訪時，笑言前晚能夠與老婆單文柔拍拖來看《龍虎武師》首映場，都係多得上天安排。展鵬稱：“如果唔係打風掛八號風球，我都冇呢個機會。因為我正趕拍的《童時愛上你》和《隱形戰隊》兩部新劇，打風取消了拍攝通告，等於放了一晚假，可以同老婆拍拖睇戲。（覺得《龍虎武師》這電影如何？）《龍虎武師》給我感覺好有意義，因為佢哋代表香港的拚搏精神，我平日都有拍動作戲，但同佢哋比，我只是花拳繡腿！”

單文柔與老公陳展鵬前晚現場擺出對打的甫士讓大家拍照，問她老公平日經常拍動作戲，可擔心他會受傷？單文柔表示：“唔擔心，佢身手好好，我哋喺屋企間中都會切磋一下。（邊個打贏？）梗係我贏啦！”身旁的展鵬即笑說：“咁你哋知道我點解身手咁敏捷啦，因為識得避吖嘛，哈哈！其實，老婆都好體貼，我間中拍戲撞瘀或受傷返到屋企，佢都會立即幫我捽跌打藥油。（做了老竇，拍動作戲時會否較以前錫身？）好難嘅，如果你拍動作戲冇咁危險，變相就會冇咁好睇，但當然都要事先做足安全措施啦！”

錢嘉樂前晚偕太太湯盈盈及兩個女兒一齊出席《龍虎武師》首映禮，嘉樂是該片的監製之一，但他笑言自己對票房數字沒有壓力，他表示：“真係很多謝導演和多位大哥肯出來幫我完成呢個夢，好難得咁人馬齊整！（少了成龍？）佢有親自拍短片來支持我哋，卻因涉及好複雜的肖像權問題，最後只好忍痛剪走了。”嘉樂坦言前晚首映禮真係好開心，因為可邀請到程小東出席，他花上近一小時通電話，才成功邀請到對方捧場。