胡鴻鈞拍心口開騷跳舞

胡鴻鈞 (Hubert) 日前接受無線娛樂新聞台節目專訪，大談開騷感受，直言出道唱歌近十年，開騷時機已成熟：“之前有好多人問我幾時開騷？我自己都心急、每一年都好想開。但我同自己講唔好急，之前覺得仲未準備好，一路吸收、一路學習，到依家開始有信心站上一個大型舞台。”

Hubert 表示一八年試過搞一個小型音樂會，其中一個環節係與嘉賓Dear Jane合唱，他說；“當時自我感覺良好，好興奮，但我之後睇返錄影，才發覺自己有啲失控，欠缺大將之風，所以今次要提醒自己保持冷靜。”

談到事先張揚於演唱會上跳舞，Hubert說：“跳舞一定有！老實講，我跳舞唔係好得，但我好自信咁話畀大家知，唔會難睇。過去我冇乜場合可以又唱又跳十分鐘、勁歌熱舞幾首歌，所以今次對我來講真係一個挑戰，推動自己進步！至於除衫，其實我真係好唔明點解開騷要除衫？大家到時入場睇就會知！好彩之前拍電影做拳手角色，要在幾個星期內由六十九公斤減到六十公斤。依家升咗一公斤，因為冇之前食得咁清，但就幫我開咗個頭，我會Keep住操練同做運動，至少除衫好睇啲！”