秋 菊

秋天係菊花盛開嘅季節，最近老周我去咗轉中山，睇咗一個幾出名嘅菊花展，醒起又係時候食菊花宴啦！喺澳門，夏天嘅荷花宴大家就聽得多，秋天嘅菊花宴其實都受唔少廣東人喜愛，當中一定唔少得菊花鯪魚球、菊花扣肉、菊花松子魚、菊花八寶飯等經典菜式。

菊花清香宜人，有助降火去燥，除咗成日飲到嘅菊花茶、菊花酒，一到秋天，粵菜好多時都會用到鮮菊入饌。今期我就想分享一味個人十分喜歡嘅懷舊菊花菜——菊花鱸魚羹；鱸魚同樣喺秋天當造，經常會畀人用嚟同菊花一齊煮，菊花嘅花香同鱸魚嘅鮮甜一拍即合，做成湯羹都幾滋味。

材料有：鱸魚肉四両、筍尖片二両、鮮草菇一両、蛋白一隻、白菊花一朵、雞湯半公升、生粉兩湯匙、鹽一茶匙、芫荽一棵、麻油、酒、胡椒粉各少許。做法：鱸魚順紋切薄片，同埋其餘材料一齊汆水，待用；雞湯煮滾後放入所有材料同麻油以外嘅調味料，以生粉打芡，加入蛋白做個蛋花之後就可熄火，上碟時拌入白菊花花瓣、芫荽同埋麻油就可以。

周 中

（澳門美高梅金殿堂烹飪顧問）