街市管理新規例

十進制確好易計

超市商舖管唔到

全澳統一才是好

出咗半斤力，想話攞返足八両。家陣惡搵食，邊有半斤八両咁理想？──歌神許冠傑四十多年前的《半斤八両》歌詞，唱出不少打工仔心聲，疫下的今天仍未過時。不過踏入新一年，本澳居民去街市買餸，就不必為唔識計一斤七両幾多錢而搲頭。

元旦日《公共街市管理制度》實施的第一天，不才走進全澳最大的祐漢街市，所有攤販皆明碼標價，且舊制（司馬斤、両）與公制（千克、一百克）並列。當然，也有論堆或論個（條）標價。總體來看，雖然一樣貨品標兩個價錢，並無增加買餸消費者的不便；只是攤販寫價錢牌前要先作一番換算，及要多寫一個價錢，可能會麻煩。

只不過，有人擔心法例只規管街市，超市又如何？甚至不屬公共街市的義字街將冇王管。消息靈通人士則報料稱好似傾掂咗，義字街和超市都用埋新例，全澳統一好啲。為解心中疑團，不才專門到義字街群隊街一帶走走，各家商舖各施各法，基本上都有用公制，舊制有標磅、安士，有標司馬斤、両。有啲仲簡單，淨係標一份。個別參茸海味店則僅標斤、両，菜檔生果檔則標磅。亦有人發圖報料，附近羅利老馬路三盞燈菜、生果商舖，仍僅標磅。

不才又轉去祐漢新苗超市，肉類同時標磅及公斤，不過蔬菜則只標磅，水果有論個，亦有論磅。

市政諮詢委員、資深餐飲人羅錦焜認為，應該全部統一推行新例，否則冇乜意思。

鍾秋生