吊 片

最近疫情關係，身邊唔少朋友都話要慳錢，所以多咗返屋企食飯。老周我就覺得要慳錢都唔可以虧待自己同屋企人嘅肚皮，大家平日可以多啲喺屋企煮飯仔，留返周末或假日先出街食好啲，平衡吓飲食，身心都開心同健康啲。

今期我想分享吓用吊片炒菜。吊片其實係細細隻嘅魷魚，以前啲漁民會將捉到嘅魷魚劏好，吊喺艇仔上天然風乾，所以就叫做吊片。呢啲乾魷魚充滿海水獨有嘅鹹鮮味，蒸餸或做小炒風味一流。最上乘嘅吊片當然係百分百生曬，不過而家就真係買少見少啦。

今期教大家整一道經典小炒——“吊片炒韭菜”。材料有：吊片兩隻，韭菜四両，蠔油兩茶匙，生粉一湯匙，葱度、薑、蒜適量，麻油、料酒少許。先將吊片洗淨，用熱水浸泡至軟身，後切片待用。起鑊，落薑、葱同吊片爆炒，再加入韭菜一齊炒。最後落調味料，用生粉水打個芡即可上碟，超級簡單！

（澳門美高梅金殿堂烹飪顧問）

周 中