夏日香芒蝦卷

夏天一到，又到咗芒果當造嘅時候，清甜多汁象牙芒、呂宋芒、百花芒等種類都可以同時買到，鍾意食芒果嘅朋友呢排一定食得好開心。不過大家要記得芒果性質帶“濕毒”，鍾意食都唔好一次過食太多，有濕疹等皮膚問題嘅朋友都係少食為妙。

平時用芒果嚟整西餅甜品、沙律冷盤就聽得多，但用嚟做主菜就真係少見啲。呢排天口熱，好容易搞到食慾不振，所以今日老周我就同大家分享一個簡單又清爽嘅芒果菜式──夏日香芒蝦卷，小朋友都一定啱食，攞嚟做派對小食都唔錯。

材料有：芒果一個，越南蝦仁四両，方包四塊，雞蛋一隻，生粉二両，鹽少許。將芒果去皮切條，方包飛邊；蝦肉加些少鹽同生粉，打成蝦膠備用。將適量蝦膠塗喺方包上，然後擺入芒果條，卷成圓形，再浸喺生粉同雞蛋混成嘅蛋漿。確保每條卷都用蛋漿埋好口後就可落油鑊炸。用中火炸至金黃色，炸好就可以攞出嚟放涼，切件上碟。

（澳門美高梅金殿堂烹飪顧問）

周 中