老黃瓜煲湯

時值夏天，天氣十分潮濕悶熱，係時候煲啲祛濕湯水，同時消消暑。俗語都有話“濕邪乃萬病根源”，暑氣又容易夾濕熱，所以炎炎夏日祛濕對身體嘅健康十分重要。脾氣健運，濕邪自去，祛濕最簡單就係從飲食入手，最好就食得清淡啲，多食容易消化嘅食物，以免增加脾胃負擔。

消暑食品嚟講，夏季當造嘅老黃瓜確係平、靚、正嘅選擇，可清熱解暑，利水消腫，最啱攞嚟煲湯。老周我今期就一於同大家一齊祛下濕，用老黃瓜煲返個簡單又有功效嘅湯水。

材料有：老黃瓜約一斤、豬一條、雲苓一両、扁豆五錢、陳皮一片、薑四片、鹽適量。做法：先將老黃瓜洗淨、開邊同去核，切件備用；豬出水後，同雲苓、扁豆、陳皮、薑等放入煲，用清水煲約一個半鐘，最後加鹽調味即可。提提大家，老黃瓜性涼，若果身體偏寒同虛弱嘅朋友，或者有肝腎病、胃病同痛風人士，就少食為妙。

周 中（澳門美高梅金殿堂烹飪顧問）