梅子大魚頭

老周我好鬼鍾意食魚，但前排休漁期無乜嘢魚賣，所以就要轉食淡水魚，或者食吓魚頭嘅菜式。魚頭雖然無乜肉食，唔係個個人鍾意，但佢勝在口感夠嫩，同時營養豐富，有不飽和脂肪酸，又充滿膠質，夠晒美顏，女士們食就最啱啦。今期分享一味“梅子大魚頭”，材料同平時家常嘅魚頭菜式冇乜嘢分別，只係加咗幾粒酸梅增加風味，酸酸甜甜就更開胃。

材料有：大魚頭一個（約十二両），磨豉醬一湯匙，生粉半湯匙，糖半湯匙，豆腐一大磚，酸梅子四粒，薑同葱適量。做法：將魚頭洗淨，開邊，豆腐切開成四件，備用。魚頭表面輕輕拍上生粉，落油煎一煎香表面，之後放入薑、葱、磨豉醬、糖同酸梅，落一碗清水，再小心放入豆腐，冚好蓋煮約七分鐘，即可上碟。食之前亦可加返啲芫荽同葱花喺面就更靚啦。

（澳門美高梅金殿堂烹飪顧問）

周 中