福建無福建炒飯

星洲無星洲炒米，福建無福建炒飯，大家係咪都覺得好搞笑？喺港澳地區嘅粵菜師傅好鍾意幫啲菜式改啲“呃人”嘅名，特別係以上兩個例子咁，同其他地方有關係。名稱由來有唔少版本，不過呢啲就全部都係港式茶餐廳或茶樓常見嘅碟頭飯，見到呢啲異地名稱都好有親切感。當然，叫得碟頭飯，做法都唔會太複雜，所以大家喺屋企都可以快快手炒出嚟，啱晒周末唔想用太多時間煮飯嘅朋友仔，仲可以隨意加啲自己鍾意嘅材料，整個足料豪華版都得。

材料有：隔夜白飯一碟、雞肉一両、蝦肉一両、雞蛋一隻、瑤柱三粒、冬菇兩隻、菜心一両、鹽半茶匙、甘筍粒一両、雞湯半碗、蠔油一湯匙、生抽一茶匙半、麻油少許，以及生粉一湯匙半。做法：將瑤柱同冬菇稍稍浸泡；菜心、冬菇、雞肉同蝦肉切丁，然後一齊出水，備用。隔夜飯用雞蛋炒好上碟，除生粉以外，一次過將所有材料同調味料一齊炒。最後用生粉打個芡，淋上飯面即可。

周 中

（澳門美高梅金殿堂烹飪顧問）