秋天鯉魚

正所謂“春鯿秋鯉夏三鯠”，鯉魚一到秋天就最肥美，營養價值高，含豐富蛋白質，仲有下氣、平肝補血、補脾健胃、利水消腫等嘅功效。而家雖然冇咁流行食鯉魚，但舊時真係四周圍都有得食。喺廣東，好多地方一到秋冬都會推出鯉魚煲等嘅懷舊菜。今期老周我就教大家整返味“薑葱煀鯉魚”，等大家回味下舊時嘅滋味。

提提大家，買鯉魚最好買公嘅，事關乸嘅魚籽太多；最好嘅品種一定係文慶鯉，肉質飽滿，嫩滑又甘香，但價錢就當然貴啦，亦好少喺街市見到。

“薑葱煀鯉魚”材料有：鯉魚一條（約十四両）、枝竹一條、薑葱二両、蒜少許、蠔油一湯匙、鹽一茶匙、糖一茶匙、酒兩茶匙、麻油同胡椒各少許、芫荽一棵、生粉一湯匙。鯉魚唔使去鱗，只需事先洗好、乾水；枝竹浸軟，葱切度，薑拍碎。鯉魚用油鑊煎香兩邊後，薑、葱、蒜爆香，加入半碗清水，再放埋其餘調味料，煮沸後蓋好煮約五分鐘，翻一翻啲肉再焗多五分鐘，最後打返個芡，鋪返啲芫荽就食得啦。

周 中（澳門美高梅金殿堂烹飪顧問）